الإعلامي الرياضي أحمد شوبير فتح ملف مهم خاص باثنين من محترفي نادي الزمالك، شيكو بانزا وبيزيرا، وبدأ يتكلم عن أداءهم في الملعب وركز على أن المهارات الفردية لوحدها مش كفاية.
شوبير كتب على منصة «إكس» إن عنده مليون علامة استفهام حول بانزا وبيزيرا، وذكر إن بانزا لاعب مميز جدًا لكن مش حاسس إنه بيستغل إمكانياته بشكل كامل، يعني زي ما يقولوا كده مقضيها وخلاص، مش ظاهر إنه بيقدم كل ما عنده.
شوبير ”عندي مليون علامة استفهام على ثنائي الزمالك، شيكو بانزا وبيزيرا، بانزا احساسي الشخصي إنه لاعب جامد أوي ومهاراته عالية، ولكن مش حاسه بيأدي 50% من اللي عنده، زي ما بيقولوا كده مقضيها وخلاص، مش بيقدم كل اللي عنده، أما بيزيرا عنده مشكلة واضحة في لعبه الجماعي مع الفريق، الكورة… pic.twitter.com/QieJyOxSdg
— Ahmed Shobier (@ShobierOfficial) January 26, 2026
وبالنسبة لبيزيرا، شوبير قال إنه عنده مشكلة واضحة في اللعب الجماعي، مش كل حاجة بتكون مهارات فردية، وفيه نقص في الخطورة على المرمى، مش حاسس إن فيه تهديد حقيقي للمرمى زي لما ينزل ناصر منسي اللي كلنا عارفين إنه خطر على المرمى في أي وقت.
محمد صلاح
على جانب آخر، شوبير أشاد بالنجم المصري محمد صلاح لاعب ليفربول وقائد منتخب مصر، خصوصًا بعد الضغوط اللي تعرض لها في الفترة الأخيرة بخصوص مستقبله.
شوبير قال في تصريحات إذاعية إن صلاح شخصية مصرية جدعة ولها مواقف إنسانية جميلة مع أهل بلده في الغربية، وده يبين شخصيته بره الملعب.
وأضاف شوبير إنه ما تواصلش مع صلاح من 2019، وذكر إنه انتقده في موقف عمرو وردة لما كان صلاح قائد للمنتخب، لكنه أكد إن النقد كان بدافع الحرص على مصلحة الفريق مش تقليل من دوره.
وفي نهاية حديثه، شوبير أكد إن كل لاعبي المنتخب مشيدين بمجهود صلاح الكبير في كأس الأمم الإفريقية، ودوره كان مؤثر داخل وخارج الملعب، وأشار إنه واحد من أهم نجوم الكرة المصرية على مر العصور.
التعليقات