أحمد شوبير علق على التحسن الكبير اللي حصل في نادي الزمالك الفترة الأخيرة، ووضح إن الاستقرار الفني بدأ يظهر بشكل واضح في أداء الفريق في الملعب.
شوبير، خلال برنامجه الإذاعي، أكد إن المدير الفني بيظهر بأسلوب هادئ وواقعي في التعامل مع المباريات الصعبة، وده زود ثقة الجماهير في مستقبل الفريق، خصوصًا مع القرارات المدروسة اللي بياخدها خلال المباريات.
وأضاف شوبير: “معتمد جمال مدرب واقعي، مش متهور، وعارف يتصرف في الأوقات الصعبة، وده خلّى جمهور الزمالك يثق فيه لدرجة إنهم بقى يقولوا: مش عايزين مدرب أجنبي، عايزين معتمد جمال”
وكمل شوبير حديثه إن معتمد جمال حقق نجاحات كبيرة قبل كده، ورغم إنه اتقال بعد خسارة واحدة بس، لما رجع تاني للزمالك، كان تركيزه كله على إعادة الفريق للطريق الصحيح، وده شيء يُحسب له ويعكس شخصيته المحترمة.
شوبير أكد كمان إن معتمد جمال مدرب واقعي مش بيحب يعاند، وبيصحح أخطاءه بسرعة، خصوصًا في التشكيل، وده دليل على عقلية فنية ناضجة تستحق الدعم.
الجهاز الفني لنادي الزمالك بقيادة معتمد جمال قرر ما يمنحش اللاعبين راحة بعد الفوز على المصري في كأس الكونفدرالية الأفريقية.
الزمالك هيرجع للتدريبات يوم الاثنين على ستاد الكلية الحربية، استعدادًا لمواجهة كهرباء إسماعيلية في الجولة السابعة عشرة من الدوري الممتاز، المقرر لها يوم الأربعاء.
فاز الزمالك على المصري بهدفين مقابل هدف في المباراة اللي أقيمت على ستاد السويس، وده خلى الفريق يرفع رصيده لـ 8 نقاط ويتصدر المجموعة.
معتمد جمال: قهرنا أزمة الإنفلونزا.. و90% من قوة الزمالك في جماهيره
معتمد جمال عبّر عن سعادته بالفوز على المصري في كأس الكونفدرالية الأفريقية.
قال في المؤتمر الصحفي بعد المباراة: “الفوز كان مهم جدًا، وكل فريق عارف طريقة لعب التاني، وبشكر نبيل الكوكي لأن فريقه قدم مباراة كبيرة”
وتابع معتمد جمال: “قسمنا المباراة لأجزاء، ونجحنا في تحقيق الهدف بالفوز وصدارة المجموعة”
أضاف: “جمهور الزمالك دايمًا ورا الفريق، ومن غيرهم إحنا بنفقد 90% من قوتنا، وده اللي عودتنا عليه جماهير الزمالك الوفية”
وقال معتمد جمال: “آدم كايد قدم مباراة ممتازة، وكنت أتمنى إنه يسجل، لأنه بيبذل كل جهده للفريق”
وكمل: “كل مباراة لها تشكيل معين، بنختار التشكيل والخطة حسب المنافس، وكل اللاعبين هيشاركوا في المباريات الجاية”
وواصل معتمد جمال: “محمد إسماعيل لاعب مميز، وأي مدرب يتمنى وجوده، لأنه يجيد اللعب في أكتر من مركز”
أضاف: “حققنا الهدف من اللقاء، ومش عارف إذا كانت ركلة الجزاء المحتسبة ضدنا صحيحة ولا لأ، لكن كنت أتمنى نخلص الشوط الأول متقدمين”
التعليقات