نفى الإعلامي أحمد شوبير كل الأخبار اللي انتشرت على السوشيال ميديا عن الطلبات المالية لمصطفى شوبير لتجديد عقده مع الأهلي، خصوصًا أن عقده مع النادي بيخلص في نهاية الموسم الحالي 2025-2026.
شوبير قال في لايف على حسابه الرسمي على فيسبوك: “في هاشتاج اتعمل بخصوص مصطفى شوبير واتشال بعد نص ساعة، الكلام دا كله إشاعات، مصطفى عاوز 60 مليون جنيه وأبوه مش عارف إيه، ياريت جمهور الأهلي يكون واعي والهاشتاجات دي لها أغراض، والوقت محتاج تكاتف”
شوبير: ابني أهلاوي وابن أهلاوي.. وعقده أقل من 5 ملايين جنيه
أحمد شوبير ما سكتش عن القضية اللي انتشرت عن مستقبل ابنه مع الأهلي، خاصة مع قرب انتهاء عقده بنهاية الموسم الحالي 2025-2026.
شوبير قال خلال برنامجه “الناظر” على قناة النهار: “الكلام دا آخر مرة هتكلم فيه، مفيش أي كلام رسمي مع مصطفى شوبير بخصوص التجديد، هو أقل عقد في الأهلي، حتى اللي قالوا بياخد 5 مليون جنيه، مصطفى عمره ما وصل عقده لـ5 مليون جنيه”
وواصل شوبير حديثه وكشف الحقائق قائلاً: “الكابتن خالد بيبو كان فاتح الموضوع من سنتين ومش حصلت جلسة، وكابتن محمد يوسف برضه، والموضوع قفل، اللاعب مركز وبيتمرن ومش مركز مع أي حاجة تانية، مصطفى مرتبط بوكالة إسبانية والناس سألت كابتن محمد يوسف قبل الموسم، رد عليهم قال: ‘النادي إيه’، وهم قالوا ‘لا، قول الرقم’. بعد 3 ساعات، كان رد محمد يوسف: ‘مصطفى شوبير ليس للبيع'”
وأكمل شوبير حديثه عن مستقبل ابنه مع الأهلي قائلاً: “بعد كده، وصل عرض رسمي من نادي الخلود لضم شوبير، عاوزين كام إعارة أو بيع، لكن النادي رد عليهم: مصطفى شوبير مش للإعارة ولا للبيع، والموضوع مقفول، مصطفى أهلاوي ابن أهلاوي، وعقده ممتد لحد نهاية الموسم الجاي، تحت أمر الأهلي، لكن كل الكلام اللي اتقال من إمبارح مش صحيح، مفيش أي كلام عن التجديد ولا ترضية، وبصراحة مفيش حاجة اسمها ترضية لأي لاعب، أنت لاعب موقع على عقد تلتزم بيه، دي قصة مصطفى شوبير من الألف للياء”
التعليقات