إسلام عيسى لاعب سيراميكا كليوباترا ومنتخب مصر الثاني، أكد إنهم كانوا متعاهدين على الفوز بكأس العرب، لكن الحظ كان ضدهم وسبب الخروج من البطولة.
في تصريحات مع سهام صالح في برنامج الكلاسيكو على قناة أون، قال إسلام إنهم تكلموا قبل البطولة عشان يكونوا مستعدين ويحققوا اللقب ويرجعوا بالكأس من قطر.
وواصل إسلام حديثه، مش عارف إيه سبب عدم انضمام لاعبي بيراميدز للمنتخب في البطولة، لكن اللاعبين اللي كانوا موجودين عملوا كل اللي عليهم.
وقال كمان إن الحديث عن تأثير غياب لاعبي بيراميدز مش منطقي، لأن القائمة كانت فيها 23 لاعب مميز، والمنتخب كان عارف بغيابهم.
«أسف مليون مرة».. أول رد من قفشة بعد خروج منتخب مصر من بطولة كأس العرب
محمد مجدي قفشة اعتذر لجمهور الكرة المصرية بعد خروج المنتخب من البطولة، معتبراً إن اللي حصل مش مناسب لاسم مصر.
كتب قفشة على أستوري إنستجرام: «قبل أي كلام، لازم أقول جملة واحدة بس، آسف جداً جداً، مهما حصل اسم مصر كبير وكان في أفضل من كده»
أضاف: «أنا بعتذر وحزين جداً ومش بهرب من أي مسؤولية، اللعب باسم منتخب مصر مينفعش فيه الأداء اللي حصل، مفيش تبرير غير كلمة آسف»
واختتم قفشة: «حقكم بصراحة، آسف مرة واحدة مش كفاية، آسف مليون مرة»
وعلى جانب آخر، قصي أبو عالية نجم منتخب الأردن السابق، عبر عن استيائه من مستوى منتخب مصر في البطولة، واعتبر إن أداء الفراعنة كان بلا روح أو خطة واضحة.
أوضح أبو عالية في تصريحات لبرنامج ستاد المحور، إن الأداء لم يكن متوقع بالمرة، خاصة مع الإمكانيات الكبيرة اللي عند الفريق، وأشار إن التراجع الفني كان مفاجئ ومخيب للآمال للجماهير اللي كانت منتظرة منتخب قوي.
أبو عالية توقع تأهل مصر لربع النهائي بجانب منتخب الأردن، لكنه تفاجأ بالتخبط داخل الجهاز الفني، وعدم وضوح الرؤية في المباريات، واللي أثر بشكل مباشر على مستوى اللاعبين.
وأضاف إن الإقصاء المبكر جاء نتيجة غياب الانضباط التكتيكي وعدم القدرة على تنفيذ خطة واضحة، ورغم إمكانيات بعض اللاعبين العالية، لكن الأداء كان بعيد عن المتوقع.
وأشار إن اللي حصل في البطولة مش بيعكس قوة كرة القدم المصرية الحقيقية، لأن أي نادي مصري ممكن يقدم أداء أفضل من اللي قدمه المنتخب.
وعن المرشحين للقب، رأى أبو عالية إن المنافسة في البطولة محصورة بين أربعة منتخبات هي: الأردن، الجزائر، المغرب، والإمارات، ودي الفرق اللي بتقدم أداء ثابت وقوي ولديها خبرة
واختتم أبو عالية حديثه بالتأكيد على إن الكرة المصرية عندها إمكانيات ونجوم قادرين على العودة بقوة، لكن اللي حصل في كأس العرب درس مهم للجهاز الفني واللاعبين عشان يعيدوا تقييم الأداء ويستعدوا بشكل أفضل للبطولات الجاية.
التعليقات