علق كرونسلاف يورتشيتش، مدرب بيراميدز، على الانتقادات اللي بتوجه له بسبب ردود أفعاله تجاه قرارات الحكام، وكمان تحدث عن شعوره بعد ضياع لقب الدوري المصري في الموسم الماضي.
وقال يورتشيتش في تصريحات إذاعية عبر آثير أون سبورت: “أحيانا بنشوف لقطات لمباريات بيراميدز، وآخرها كان مع بتروجيت، لما بنشوف قرارات الحكم تتعاد مرة واثنين، بحس إننا مش هنبقى أبطال دوري في مصر، مش هنبقى أبطالا هنا”
واستكمل: “بشوف الإعادات، لكن مفيش إعادة لصورة لما الحكم يقرر إن فيه ضربة جزاء لينا، الأمور مش بتشتغل كده، ولازم تكون أفضل من كده”
وتحدث عن الزمالك والأهلي، وقال: “هما أندية كبيرة جداً بتاريخهما، لكن في حاجة لازم نتكلم عنها، في ناس مش عايزة أي منافسة للأهلي والزمالك، وده شيء طيب”
وواصل: “في فرق بتلعب كرة قدم حلوة، والإعلام لازم يدعم الفرق دي، مش بس الأهلي والزمالك، لازم الإعلام يهتم بالأندية الصاعدة، لأن ده مهم جداً للكرة المصرية، ولازم يدعموا المحلة والإسماعيلي والمصري وبيراميدز”
وأضاف: “ممكن اللاعبين الصغار يروحوا للأهلي من الإسماعيلية أو المحلة، لأن ده مركز كرة القدم في مصر، لازم يكون فيه دعم للفرق اللي بتنتج لاعبين، عشان الكورة المصرية تستفيد، ومش لازم يكون الدعم مقتصر على الأهلي والزمالك بس”
وأردف: “الكرة المصرية محتاجة تغطية إعلامية شاملة، ممكن تكون واحدة من الفرق دي هي اللي تهزم الأهلي أو الزمالك أو تتفوق عليهم، مش بقول إن ده هيحصل، لكن بنقول إننا عايزين نقدم صورة كاملة عن كرة القدم المصرية”
لما سألناه إذا كان لسه حاسس بالألم بسبب لقب الدوري اللي فات، قال: “شيء طبيعي، هديك مثل، لو أنا سايق سيارتي وأنت سايق سيارتك، لو سيارتي وقفت، أيًا كان نوع سيارتك أو نوع سيارتي، مش مهم، لكن فيه إشارة مرور، لازم كل العربيات توقف قدام الإشارة الحمراء”
وواصل: “لو القانون اتطبق في الشارع، فيه فرق لازم توقف، وفيه فرق ممكن تعدي رغم وجود إشارة حمراء، ليه؟”
واستكمل: “بتسألني عن مسابقة السنة اللي فاتت، ليه فيه فرق مش بتوقف قدام الإشارة الحمراء؟، وفيه فرق بتمر من الإشارة الحمراء، ليه؟، لو فيه قانون أو تعليمات، لازم كل الأندية تطيعها، ضوء أحمر، قف، هل تفهم ما أقول؟”
واختتم: “أنا مش ذكرت الأهلي، ولا أي نادي، أنا بتكلم بشكل عام، وإجابتي واضحة، والناس هتفهم، عارفين إننا مش أبطال لسه”
التعليقات