محمد أشرف روقا، لاعب الزمالك السابق وحاليًا في حرس الحدود، خرج بتصريحات قوية لاثنين من نجوم الأبيض السابقين، عبدالواحد السيد وأيمن عبد العزيز، وحب يتكلم عن بعض الأمور اللي تخصهم.
كتب روقا على إنستجرام: “أول مرة أكتب حاجة وأرد على حد وأذكره باسمه. كابتن عبد الواحد، أنت عارف أنا بحبك وباحترمك، وده البند اللي في عقدي واللي حضرتك قلت إنه مش موجود أو البند ميخصش الفسخ من طرف واحد”
وكمل حديثه: “حضرتك بتقول المفترض إني شخص متربي، لا، أنا متربي ومتربي كويس جدًا، ومش مستني حد يقول لي أنا متربي ولا لأ، وأنت عارف إني مليش في الكدب والتحوير”
100 مباراة قبل الزمالك
بعد كده، وجه حديثه لكابتن أيمن عبد العزيز، وقال: “أنت بتقول إني جيت الزمالك من لا شيء، أنا مش مشكلتي إن حضرتك متعرفش حاجة. أنا قبل ما أجي الزمالك لعبت أكثر من 100 مباراة، ولعبت منتخب أولمبي مع كابتن حسام البدري، ورُشّحت لمنتخب مصر مع كوبر، فأنا الحمد لله مروحتش الزمالك من لا شيء”
وأضاف: “ثاني حاجة، أنا ما بقدمش حجج زي ما بتقول، مليش في الجو ده خالص، وأنت عارف أنا مين وابن مين، وأنا مش مستني الناس تهاجم حد عشان أطلع أتكلم. حضرتك بتقول إني خدت فلوس 6 سنين مجتش من سنة، لا، أنت متعرفش حاجة وبتتكلم بس، ومش عارف إني كنت بقعد 5 و6 شهور ميدخلش بيتي جنيه”
واختتم تصريحاته: “أما بالنسبة لحوار جوميز، فأنا مش محتاج أتحجج، ربنا بس وحده اللي يعلم إذا كنت بكدب أو صادق، فأنت متطلعش تقول أي كلام فارغ عني، وركز في شغلك بدل ما كل فرقة بتشغلها بتفشل وبعد كده تمشي”
التعليقات