كشف الإعلامي أحمد شوبير عن تفاصيل مهمة بخصوص صفقات النادي الأهلي الجديدة، والمراكز اللي الجهاز الفني عايز يقويها، وكمان موقف بعض الأسماء المطروحة للتعاقدات.
قال شوبير في تصريحات عبر برنامجه الإذاعي: “احنا بنتكلم عن اللاعبين اللي ممكن ينضموا للنادي الأهلي، وأعتقد إن صفقة يوسف بلعمري قربت تخلص لصالح الأهلي”.
وتابع: “حابب أوضح إن موضوع محمود بنتايج، لاعب الزمالك، كان مطروح ضمن الخيارات، لكن الأهلي ما سعى للتعاقد معه بشكل مباشر، هو لاعب جيد ومحترم، وبيشارك مع منتخب المغرب الثاني، وبيقدم مستوى مميز”.
وأضاف: “بالنسبة ليوسف بلعمري، الأمور قربت تتحسم، حتى لو الأهلي اضطر يسدد الشرط الجزائي اللي حوالي نصف مليون دولار، وهو رقم مناسب بالنسبة للنادي الأهلي، وكمان الطرف الآخر عايز إتمام الصفقة”.
واستكمل: “أما الاسم الثاني فهو حامد حمدان لاعب وسط بتروجيت، ييس توروب معجب به، ومافيش مشكلة في انضمامه للفريق مع أليو ديانج، الأهلي محتاج لاعبين في المركز ده، وبالتالي هو من ضمن أولويات الأهلي”.
وأوضح: “هل بيراميدز دخل في الصفقة؟ أيوة، بيراميدز دخل بقوة، لكن الرغبة هي اللي هتحسم الأمر في النهاية، هل اللاعب عايز ينضم للأهلي؟ الزمالك تأخر شوية، وواضح إنهم عندهم أزمة مالية”.
وأردف: “هل ممكن رجال الأعمال اللي ينتموا للزمالك يتدخلوا في الصفقة؟ هل بيراميدز هيحسم الصفقة في النهاية؟ كل ده مطروح لحد دلوقتي”.
واختتم: “البعض ممكن يتساءل: فين المهاجم؟ لحد دلوقتي، الأهلي ما استقرش على مهاجم، هتسمعوا أسماء كتير زي ديابيتية وبابلو صباغ وغيرهم، لكن الكابتن توروب لسه بيراقب، لأنه عايز لاعبين على مستوى الأهلي، وده بيخلي الأمور مفتوحة”.
التعليقات