تحدث محمد أسامة، طبيب الفريق السابق بنادي الزمالك، عن تجربته مع النادي والتحديات اللي واجهها مع اللاعبين والأزمات الطبية اللي مر بيها خلال فترة وجوده.
وقال أسامة في تصريحات عبر “أون سبورت إف إم”: “بالنسبة لرحيلي عن الزمالك، أنا هنا النهاردة عشان الزمالك، وده شرف كبير لي، أي حد بيشتغل في الأهلي أو الزمالك أو منتخب أو أي نادي كبير، بيكسب سمعة طيبة، وأنا قضيت ثماني سنين في الزمالك، وفي الآخر حسيت إني مش قادر أقدم حاجة جديدة، وقررت أرحل بناءً على إحساسي الشخصي”
وأضاف: “حسيت إن النادي يمكن ما كانش عايزني أكمل، مش عارف، يمكن الإدارة توضح كده، لكن احترامي ليهم موجود، لو كانوا عايزينني أكمل، كنت هكمل”
وتابع: “لو كنا نفذنا اللي كنت بطلبه من سنة، كنا قدرنا نحقق حاجات كتير، كنا بنشتغل بإمكانيات محدودة جدًا، ومش قصدي التقصير، طبيعي تحصل أخطاء أو مشاكل طبية، زي ما بيحصل في أي شغل”
وأشار: “واجهنا مشاكل كتير، لكن عمري ما اشتكيت، كابتن أحمد حسام ميدو كان عارف كده، وأشكره لأنه لاحظ الوضع لما جه وكان مصدوم، استلمنا بعض الأجهزة في آخر شهور بس، زي أجهزة العلاج الطبيعي، وكنا مفتقرين لأغلب المعدات، كنت بشتغل بجهاز واحد بس في الملعب، وده كان صعب جدًا”
وأضاف محمد أسامة: “في أمور ممكن نلاقي ليها بدائل، لكن في حاجات تانية لا، لو كانت الإدارة عايزة أكمل، كان ممكن نحل مشاكل كتير، أنا دايمًا بستغل الفرص اللي بتجيلي، والحمد لله”
وعن عمله مع أندية تانية: “مابحبش أتكلم في التفاصيل، لكن اللي أعرفه إن في فرق شغالة بشكل كويس، زي المنتخب والأهلي وبيراميدز وزد، دكتور عمرو من الكوادر الممتازة، وبيحاولوا يجهزوا فرق كاملة ويوفروا الأجهزة اللازمة، وأشوفهم بيبذلوا جهدهم ضمن الإمكانيات المتاحة”
وعن انتمائه للزمالك: “أنا زملكاوي، ومش هشتغل في أي مكان تاني غير الزمالك، أنا طبيب بحب شغلي، وكرة القدم مش الأولوية الأولى بالنسبة لي، عندي عيادات ومستشفيات وده الأساس”
وأوضح موقفه من الإصابات: “أصعب إصابة كانت لأتشيمبونج في العضلة، واحتاجت تقنية خاصة كان ممكن تطبيقها على اللاعبين الشباب، لكن كان مصاب، وكان الوضع صعب، كمان إصابة إبراهيم نداي كانت من بين الإصابات الصعبة، ودائمًا بستعين بخبراء الإصابات في الحالات الحرجة”
واختتم حديثه بخصوص التعامل مع اللاعبين المصابين: “عادةً مش بقول اللاعب بالإصابة في البداية، إلا في حالات معينة، وبستنى لتقييم كل الأمور، وفي الآخر الموضوع بيني وبين اللاعب، مع الحرص على الدقة في الفحوصات والأشعات”
التعليقات