بارنز: محمد صلاح ليس له حق إلهي في اللعب أساسي وزيندن يرشح لاعب باريس سان جيرمان لخلافته

محمد صلاح مستمر مع ليفربول حتى 2027، لكن الحديث عن من سيحل محله بدأ يتزايد في الفترة الأخيرة، خصوصًا بعد الأداء المتذبذب له هذا الموسم.

ليفربول صرف أموال كبيرة على لاعبين زي ألكسندر إيزاك وفلوريان فيرتز، لكن صلاح مش في أفضل حالاته، وتصريحاته بعد مباراة ليدز يونايتد كانت تعبر عن استيائه من الوضع الحالي.

بولو زيندن، نجم تشيلسي السابق، قال لموقع “ليفربول دوت كوم”: “صعب جدًا نلاقي بديل لمحمد صلاح في ليفربول، لكن عندي لاعب في بالي يقدر ينجح في أنفيلد”

وأضاف: “أتمنى انضمام ديزري دوي من باريس سان جيرمان، موهبة رائعة، صحيح إن باريس عنده باركولا، لكنه يلعب جناح أيسر، وليفربول محتاج جناح يمين عشان يحل محل صلاح، فكرة إيجاد بديل لصلاح صعبة، لكن دوي ممكن يكون إضافة ممتازة لو اضطروا لاستبداله”

وفي نفس السياق، جون بارنز، نجم ليفربول السابق، رأى إن صلاح ماكانش له الحق في انتقاد الريدز أو آرني سلوت بسبب استبعاده من الفريق.

بارنز قال: “مفيش حد له حق إلهي إنه يكون موجود في الفريق، خاصة لو الأداء مش جيد، مكانك في الفريق لازم يعتمد على الأداء، لو صلاح كان بيقدم مستوى جيد، كان هيكون محق، بس ما أقدرش أنكر إنجازاته السابقة، لكن الماضي مش مبرر للحاضر أو المستقبل”

وتابع: “ليفربول تعامل مع الموقف بشكل مناسب، سلوت كان حازم في استبعاده، وقال كل اللي عاوز يقوله، وبعد كده رجعه في المباراة اللي بعدها وسجل هدف وقدم أداء جيد”

وأكمل: “مش عارف هو حاسس بإيه، ممكن يكون فاكر إنه كان واخد وعد باللعب بشكل مستمر، لكن لما اللاعب يوصل لـ 33 أو 34 سنة، ويدرك إنه مش قادر زي الأول، بيحس بإحباط شديد، لأن هو لسه فاكر إنه قادر على العطاء، وأنا كنت بحس بنفس الشيء، أشوف نفسي أركض على التلفزيون وأدرك إني بقت أبطأ من الأول”