الكاتب الصحفي محمد صلاح علق على وضع الكرة المصرية بعد الخروج من كأس العرب، وقال إن المنظومة مش بس فشلت، لكن كمان بتاكل نفسها بنفسها في مشهد يوضح إزاي الناس اللي بتدير اللعبة مش قادرة تتعامل مع الموقف.
بدل ما ندور على أسباب الفشل، بقى المشهد ساحة خناقات وفضائح كلامية، الكابتن حلمي طولان اتهم رئيس رابطة الأندية أحمد دياب إنه مش لاعب كرة، وإنه جاي ببراشوت على الكرة المصرية، وفي نفس الوقت طلع يبرئ رئيس اتحاد الكرة، اللي هو كمان مش لاعب، لكنه نزل بدون براشوت، وبعد كده هاجم المحلل الفني الكابتن محمود فايز لأنه انتقد أداء المنتخب، وفايز ما سكتش ورجع له الاتهام بالجهل والكذب، وكأننا في مشاجرة في قهوة مش في منظومة رياضية محترفة.
على جانب آخر، المدير الإداري للمنتخب الثاني أحمد حسن اتهم الجمهور بأنهم “لجان مأجورة”، وهددهم هو وعصام الحضري إنهم يقدروا يردوا على أي هجوم، وكأن الجمهور عدو مش هو اللي بيدعم اللعبة، والإعلام الرياضي انقسم كالعادة حسب المصالح، ده مع رئيس الاتحاد وده مع رئيس الرابطة، ولا حد مع الكرة المصرية نفسها.
وبعد كل هذا العبث، طلع نفس الناس دول يتكلموا عن استراتيجية للنهوض بالكرة المصرية حتى عام 2038، “يا نهار أسود” 2038 إيه؟ أنتم مش قادرين تديروا خسارة ولا تقبلوا النقد ولا تحترموا جمهوركم ولا حتى بعضكم البعض.
في النهاية، الكرة المصرية مش محتاجة خطة طويلة المدى، بقدر ما هي محتاجة منظومة تعرف يعني إيه مسئولية، الجمهور خلاص يئس من النهوض بالكرة في ظل وجود العناصر الحالية، وأصبح عنده قرف من تدني مستوى التعامل بين عناصر المنظومة نفسها.
التعليقات