الإعلامي محمد شبانة شن هجوم قوي على اتحاد الكرة، وطالبهم بعدم التدخل في أمور منتخب مصر الأول، خصوصًا مع قرب انطلاق كأس الأمم الإفريقية، وأكد أن أي تدخل إداري ممكن يعيد ذكريات الفشل السابقة.
شبانة أوضح في برنامج «نمبر وان» على قناة «cbc» إن منتخب المغرب هو المرشح الأول للفوز بالبطولة، وأي نتيجة غير فوزه هتكون مفاجأة كبيرة، لكن في نفس الوقت فيه فرق تانية قادرة تنافس بقوة، ومن بينها منتخب مصر، اللي خلص تدريباته للاستعداد لمواجهة زيمبابوي.
وعبر شبانة عن تفضيله عدم الحديث عن منتخب مصر من الناحية الفنية في الفترة الحالية، وقال: «يارب اتحاد الكرة ما يظهرش في الصورة، ويارب ما يتدخلش في شغل المنتخب الأول، بسبب كل الأزمات اللي شفناها قبل كده، وآخرها اللي حصل في كأس العرب»
وجه شبانة رسالة مباشرة لهاني أبوريدة، وسأل: «هو اتحاد الكرة مالهوش كبير؟»، معتبرًا أن الاتحاد في حالة من التخبط وغياب السيطرة، وسط سلسلة من الأزمات اللي حصلت في الفترة الأخيرة
من أبرز الأزمات اللي ذكرها شبانة كانت بين محمود فايز وحلمي طولان، وكمان إقالة علاء نبيل ورحيله من غير ما يستلم مستحقاته، بالإضافة لإقالة اللجنة الفنية والهجوم عليها من مصطفى أبو زهرة، وكل ده بيعكس حالة الارتباك داخل اتحاد الكرة.
شبانة انتقد كمان ظهور عصام الحضري في صورة مع فوزي لقجع وباتريس موتسيبي وجياني إنفانتينو، من غير وجود هاني أبوريدة، وسأل عن جدوى التحركات دي، خصوصًا مع الحديث عن خطط تمتد حتى 2030 من غير تفاصيل واضحة عن التطوير أو آليات التنفيذ.
كمان اتكلم عن أزمة التحكيم، وأكد إن فيه خلافات بين الحكام، ووصلت لدرجة إن بعضهم قدم شكاوى ضد أوسكار لوزير الرياضة مباشرة، بدل ما يتوجهوا لرئيس اتحاد الكرة، وهو مؤشر واضح على غياب الثقة في المنظومة.
في النهاية، شبانة ختم تصريحاته برسالة واضحة، مطالبًا بترك المنتخب الوطني بعيدًا عن الصراعات الإدارية، وقال: «سيبوا حسام حسن وابعِدوا عن المنتخب، ومحدش يزور المعسكر، مصيركم في إيد حسام حسن»، وأكد إن منتخب مصر عنده إصرار كبير على الفوز بكأس الأمم الإفريقية لو توفرت له الأجواء المناسبة بعيدًا عن الأزمات
التعليقات