تحدث أحمد حسام ميدو، لاعب ومدرب الزمالك السابق، عن مباراة منتخب مصر مع زيمبابوي، اللي أقيمت يوم الاثنين ضمن منافسات كأس أمم إفريقيا، واللي انتهت بفوز الفراعنة بهدفين مقابل هدف.
المباراة كانت ضمن الجولة الأولى من دور المجموعات للبطولة المقامة في المغرب 2025.
ميدو قال في برنامج “أوضة اللبس” على قناة “النهار”: “المصريون مش متفائلين قوي بمنتخبنا، وعشان كده قلت إنه مهم نبدأ بشكل كويس عشان ترجع الثقة بين الإعلام والجمهور”
وأضاف: “الأداء الجيد والفوز في أول مباراة مهم، خاصة إنك بتلعب ضد أضعف فريق في المجموعة، زيمبابوي كانت سهلة إنك تفرض أسلوبك عليها”
وتابع: “حققنا الفوز وابتدينا أول المجموعة بهدفين لمرموش وصلاح، والاتنين أظهروا قيمتهم، لكن لازم نحل الأخطاء، الهدف اللي دخل مرمانا أظهر لنا مشاكل كتير، لو كنا بنفس الشكل قدام فرق تانية هنتعرض لمشاكل أكبر”
وأكمل: “أشوف إنه لازم رامي ربيعة يكون موجود في الدفاع في المباريات الجاية، محمد الشناوي حارس كبير وبيمثل مصر أكتر من 10 سنين، لازم يدي الثقة للدفاع، كان فيه توتر في أدائه مع الفرص اللي جات على مرمى المنتخب، بالنسبة لي فيه عدم تركيز في أداء محمد الشناوي”
وأردف: “هدف محمد صلاح له معاني معنوية كبيرة، هو حط كل خبراته في الكرة، والهدف ده هيخليه يطلع أفضل وهيشيل عنه الضغوط”
واختتم: “حسام حسن لازم ينظم الفريق دفاعيًا، لأن الفوز على زيمبابوي مقلق، لكن منتظرين معالجة الأخطاء الدفاعية اللي ظهرت، وحالة التوتر اللي كان عليها لاعبي المنتخب قدام المرمى، جنوب إفريقيا وأنجولا فرق جيدة، لكن لو عالجنا أخطائنا نقدر نفوز عليهم”
منتخب مصر هيلعب مع جنوب إفريقيا يوم الجمعة الجاي 26 ديسمبر، في الجولة الثانية من دور المجموعات لكأس أمم إفريقيا.
التعليقات