أكد أحمد حسن، كابتن منتخب مصر السابق، إن الفراعنة دايمًا مرشحين للقب كأس أمم إفريقيا، وده بسبب جودة العناصر اللي عندهم.
منتخب مصر بيلعب النهارده الجمعة ضد جنوب إفريقيا في الجولة الثانية من دور المجموعات في بطولة كأس أمم إفريقيا بالمغرب.
وقال حسن في تصريحات لموقع “كاف”: “الجيل الحالي من منتخب مصر عنده إمكانيات كبيرة، ووصل للنهائي في 2017 و2021، والقوة الجماعية هي المفتاح لاستعادة المجد القاري في النسخة دي”
وأضاف: “الجيل ده موهوب وفيه لاعبين مميزين، وكانوا قريبين من الفوز، لكن الحظ ما كانش معهم، الفرصة لسه موجودة”
وتابع: “محمد صلاح لاعب عالمي، لكن كرة القدم لعبة جماعية، النجاح بييجي لما الكل يلعب عشان القميص والمنتخب والوطن، التألق الفردي مش كافي على المستوى الدولي”
وكمل: “عمر مرموش عنصر هجومي مبدع، يقدر يعمل الفارق في المباريات الصعبة”
وأشار: “المباراة الجاية ضد جنوب إفريقيا هتكون صعبة، هو منتخب قوي، لكن إحنا لسه مصر، لو كنا خايفين منهم، هم لازم يخافوا مننا 100 مرة”
وأتم: “منتخب مصر دايمًا من أبرز المرشحين للقب الكان في النسخة الحالية، المنتخب لسه قوي”
وكان منتخب مصر فاز في الجولة الأولى بهدفين لهدف ضد زيمبابوي، وبيتصدر الفراعنة المجموعة الثانية برصيد 3 نقاط.
التعليقات