سلط الإعلامي أحمد شوبير الضوء على كواليس رحيل الكابتن أحمد عبد الرؤوف عن الجهاز الفني لنادي الزمالك، وكشف تفاصيل الأزمة اللي حصلت بعد تصريحاته عقب المباراة الأخيرة، والقرارات اللي أثارت الجدل في النادي، وكمان الأسماء المرشحة لقيادة الفريق في الفترة الجاية.
قال شوبير في تصريحاته عبر برنامجه الإذاعي: “بعد نهاية المباراة، الكابتن أحمد عبد الرؤوف اتسأل عن محمود بنتايج، ووضح إنه ما عندوش أي معلومات غير إن اللاعب فسخ تعاقده مع الزمالك، وده كان الحقيقة، وما أخطأش في كلامه”
وتابع: “الغريب إن التصريح ده اتعامل معاه كأنه جريمة، رغم إنه قال الحقيقة، وده زعل إدارة الزمالك اللي بسرعة نزلت بيان رسمي ضد تصريحات أحمد عبد الرؤوف”
وأضاف: “بعد كده، اتخذوا قرار بإلغاء المران، وده مش مقبول، لأن إلغاء المران مش من اختصاص الإدارة، ده دور فني خاص بالجهاز الفني والمدرب، ومع ذلك تم استبعاد أحمد عبد الرؤوف”
وأردف: “أحمد عبد الرؤوف أعلن إنه اعتذر رسمي عن عدم الاستمرار في مهمته داخل الزمالك، وأكد إن الزمالك هيظل موجود في قلبه وعقله ككيان كبير تشرف إنه اشتغل فيه، وحبه للنادي وجماهيره مش هيتغير، ووجه الشكر لكل اللي اشتغل معاه من لاعبين وجهاز طبي وإداري، وقال إنه مش هيكون فيه حديث تاني، وقدم الشكر لجماهير الزمالك الوفية”
وواصل: “الزمالك لعب سبع مباريات تحت قيادة أحمد عبد الرؤوف، فاز في ثلاث وتعادل في ثلاث، وتلقى هزيمة واحدة، وحتى يوم أمس، كان الرجل بيؤدي عمله بكل أمانة، وبذل مجهود كبير، وصعد عمار ياسر مواليد 2005، واطمأن على حالة آدم كايد وعمرو ناصر، وكان شغال حتى اللحظات الأخيرة”
وقال شوبير متسائلًا: “من هيكون مدرب الزمالك الجديد؟ ده السؤال المطروح حاليًا، فيه ثلاثة أسماء مرشحة لتولي المهمة، ومنهم الكابتن طارق مصطفى، وغالبًا هيكون معاه الكابتن طارق يحيى في منصب مدير الكرة، وده الجهاز الأقرب لتولي إدارة الزمالك في المباراة الجاية ضد الاتحاد”
وأضاف: “طارق مصطفى رجع مؤخرًا من ليبيا بعد إنهاء تعاقده مع أهلي بنغازي، وهو جاهز لتولي المهمة، لكن ده مش معناه إنه المرشح الوحيد، فيه أسماء تانية مطروحة، لكنه الأقرب وبفارق كبير”
واستكمل: “من الأسماء المطروحة كمان خالد جلال، اللي عنده تجربة ناجحة مع الزمالك، ومعتمد جمال، لكن الاسم الأقوى هو الكابتن طارق مصطفى، وهو عنده رغبة كبيرة في تدريب الزمالك لأنه ينتمي للنادي ويعشقه”
واختتم شوبير حديثه: “طارق مصطفى مدرب جيد، بس محتاج أدوات وإمكانات تساعده على النجاح، من غير توفيرها، مش هيقدر يحقق النجاح المطلوب، والدور الأهم على إدارة النادي هي تجهيز كل المتطلبات اللازمة”
وأوجه حديثي للكابتن طارق يحيى، لو تولى منصب مدير الكرة، لازم يركز على إعداد كل المتطلبات بشكل واضح، عشان ما نفاجأش في يوم من الأيام بأزمات جديدة”.
التعليقات