حسام حسن، المدير الفني لمنتخب مصر، متفائل بقدرة الفراعنة على تخطي عقبة منتخب بنين في دور الـ16 من كأس أمم إفريقيا، مؤكدًا على احترامه الكبير للمنافس وطموح لاعبيه في مواصلة المشوار نحو اللقب.
منتخب مصر هيقابل بنين بكرة، الإثنين 5 يناير 2025، في مباراة مهمة ضمن منافسات دور الـ16 من البطولة.
حسام حسن قال في المؤتمر الصحفي: “عندنا طموح كبير وإن شاء الله نتخطى دور الـ16، منتخب بنين مش جايين بالصدفة، احنا بنراقبهم وعارفين إنهم كانوا قويين في التصفيات. لكن إحنا منتخب مصر اللي فاز بسبع ألقاب، والشعب كله معانا، واللاعبين عايزين يسعدوا الجماهير”
وتابع: “نعمل على دراسة نقاط القوة والضعف في منتخب بنين، وبإصرار اللاعبين وروحهم العالية، إن شاء الله نقدم مباراة كبيرة ونتأهل لربع النهائي. عندي لاعبين ممتازين وأثق فيهم”
وأضاف: “محمد صلاح واحد من أفضل لاعبي العالم، لاعب مهم وقادر على تحقيق أرقام مميزة. إن شاء الله يحقق أرقام قياسية مع المنتخب وليفربول، وهو من أعمدة الفريق، وأتمنى له التوفيق”
وعن الإصابات، قال: “مهند لاشين مش شارك في التدريبات لحد دلوقتي، لكن عندي 28 لاعب جاهزين. رغم الإصابات، استفدنا من فترة الراحة في تحسين الحالة النفسية والفنية للاعبين، وإن شاء الله تؤتي ثمارها في مباراة بكرة”
وأكمل: “أنا دائمًا بحترم كل خصم، ومش بقلل من قيمة أي منتخب. منتخب بنين وصل للملحق رغم وجود منتخبات قوية في مجموعته، ومباراة بكرة هتكون صعبة على الفريقين”
وأضاف: “بعتبر مباراة بنين نهائي، وتهيأت اللاعبين على الأساس ده. إحنا مش شايفين غير بنين دلوقتي، واللاعبين مدركين ده”
وعن اللاعبين، قال: “دائمًا بختار لاعبين يقدروا يلعبوا في أكتر من مركز. محمد صلاح عنده إمكانيات كبيرة، وعمر مرموش كمان، وكل اللاعبين قادرين على اللعب في أكثر من مركز. الأداء الجماعي تحسن بشكل كبير، وعندنا تنوع في صناعة الأهداف”
وعن الشائعات حول محمد صلاح، قال: “احنا مش بنتابع الشائعات، والحمد لله بلادنا قادرة على توفير كل حاجة للاعبين. احنا مركزين على هدف واحد، وهو إسعاد الشعب المصري”
وواصل: “أنا تحت ضغوط، لكن ضغوط إيجابية، عشان أدرك قيمة المنتخب. الضغوط طبيعية، وأحولها لدافع للعمل. هدفي هو خدمة بلدي وتحقيق مصلحة مصر”
واختتم: “هنتأكد من موقف مهند لاشين وباقي اللاعبين اليوم، وكل حراس المرمى جاهزين. لأول مرة يشارك 26 لاعب في أول ثلاث مباريات، وده يعكس ثقتي في الجميع”
التعليقات