شريف عبدالفضيل، لاعب الأهلي ومنتخب مصر السابق، طمأن الجماهير بخصوص أداء المنتخب في مباراة بنين، مؤكدًا إن القلق مش في محله، والجهاز الفني بقيادة حسام حسن عنده خطة واضحة لكل مباراة.
عبدالفضيل قال في تصريحات له عبر برنامج “نمبر وان” مع الإعلامي محمد شبانة على قناة CBC إن وجود إبراهيم عادل في المباراة أثر شوية على أداء الفريق في وسط الملعب والجبهة اليمنى، وده كان واضح في شكل المنتخب خلال اللقاء.
وأضاف: “مفيش داعي للقلق، ولو محمود حسن مرموش كان سجل الفرصة اللي ضاعت، كان شكل المنتخب هيكون أحسن بكتير” وأكد إن جمهور الكرة في مصر عنده خبرة ويعرف إن المنتخب عنده عقلية الفوز وتحقيق البطولات
وعن مواجهة كوت ديفوار الجاية، أشار عبدالفضيل إنه صعب إبراهيم عادل يلعب، والمدير الفني هو اللي هيختار التشكيل الأنسب حسب الحالة الفنية والبدنية للاعبين قبل المباراة.
وتحدث عن طريقة اللعب 3-4-3 اللي شايفها الأنسب لمواجهة كوت ديفوار، وأكد إنه لو مهند لاشين جاهز، هيكون في وسط الملعب، وإن إمام عاشور هيكون البديل المناسب لو مش جاهز، لأنه عنده قدرة على الاحتفاظ بالكرة والدفاع واستغلال الهجمات السريعة.
واختتم عبدالفضيل بتأكيده على قوة منتخب كوت ديفوار وتنظيمه، وأشاد بإمكانيات أحمد فتوح، وقال: “فتوح لاعب كبير، لو مركز ومزاجه كويس هيقدم مباراة قوية جدًا”
التعليقات