قال عبدالحليم علي إنه دايمًا مؤمن إن أي حد يقع لازم يفكر في إزاي ينهض تاني، وده مبدأ أساسي في كرة القدم وفي كل المجالات.
في نفس السياق، عبّر عن استغرابه من وصول الأمور في نادي الزمالك لمرحلة صعبة، مع الاعتماد على تدخل طرف تاني لإنقاذ الموقف، وسأل: “فين الرؤية؟ وفين الخطة؟ وفين الاستثمار والتطوير؟” وأكد إنه مفيش مسؤول طلع يوضح للجماهير النادي رايح فين أو هيكون شكل المرحلة الجاية إزاي
وأوضح إنه بيتكلم بمنطق الاحتراف وما بيحبش شخصنة الأمور، وركز إن الحديث عن جون إدوارد أو أي اسم تاني مش هو جوهر الأزمة.
وشدد على إن الزمالك محتاج من البداية مدير رياضي يدير ملف كرة القدم بالكامل، ويكون فيه محاسبة بعد ستة شهور، وإذا نجح يستمر، وإذا ما نجحش يتم توجيه الشكر له بشكل محترم.
وأضاف إن الحلول موجودة بس محتاجة بداية صحيحة، ومع التواصل الواضح مع جماهير الزمالك، لأنهم النبض الحقيقي للنادي، وأول من يقف جنبه في الأوقات الصعبة.
وطالب الإدارة بمصارحة الجمهور بخطة واضحة وخطوات محددة، وأكد إن الجماهير هتساند حتى لو كانت ملامح الخطة لسه في بدايتها.
وأشار إلى إن جماهير الزمالك معروفة بدعمها في الأزمات قبل النجاحات، فالصمت مش حل، ولازم يخرجوا يتكلموا بوضوح عن الوضع الحالي والمستقبل.
كما أكد إن الأزمات الحالية محتاجة قرارات حاسمة وسريعة، وعمل حقيقي على الأرض، مش بس تصريحات، واقترح الاستعانة بقائد قوي، مع عناصر من أبناء النادي في الجهاز الفني، وتشكيل لجنة كرة تعمل بشكل مؤسسي، مع التأكيد على إبعاد أي عنصر مخطئ بأسلوب محترم يليق بالنادي.
وتطرق أيضًا لضرورة التعامل باحترام ووضوح مع اللاعبين الأجانب، من خلال الجلوس معهم وشرح الأوضاع، مشيرًا إن إيقاف القيد الأخير كان بسبب هذا الملف، وممنوع تجاهله في المرحلة دي.
واختتم حديثه بالتأكيد على إن الحلول كتير، لكن لو الإدارة الحالية مش قادرة تنفذها، لازم يتاح الفرصة لحد يقدر يدير الملف، لأن جمهور الزمالك محتاج رؤية واضحة وملامح محددة، وأكد في النهاية إن الجميع واقف وراء الزمالك ويدعمه.
التعليقات