تحدث عبد الحليم علي، الهداف التاريخي لنادي الزمالك، عن الوضع الصعب اللي بيمر بيه النادي حاليًا، خلال تصريحات على قناة on time sports، ووجه رسالة للاعبين اللي في الفريق بعد رحيل عدد منهم بسبب عدم الحصول على مستحقاتهم المالية.
رسالة نارية من عبد الحليم علي للاعبي الزمالك
وجه عبد الحليم علي رسالة قوية للاعبين الحاليين في الزمالك، قال “لو مش هتنتمي لأكل عيشك مش هتعرف تعمله حاجة، لازم يكون عندك انتماء، ولازم يكون في غيرة وروح على تيشرت نادي الزمالك”.
وتابع العندليب، “في لعيبة مش هتنزل التمرين وهتفسخ عقودها، وأنا زعلان منهم جدًا وحزين على الزمالك”. واختتم نجم الزمالك السابق تصريحاته، “لو أنا مسؤول في النادي، مش هختار غير اللعيبة اللي عارفة قيمة الزمالك وهتقدر ظروفه الصعبة، إحنا محتاجين اللعيبة اللي عندها انتماء للنادي وعايزة تلعب كورة”.
جلسة مرتقبة في الزمالك لإنهاء أزمة أحمد حمدي
كشف الإعلامي جمال الغندور في برنامجه “ستاد المحور” عن جلسة هتحصل بين معتمد جمال، القائم بأعمال المدير الفني، وجون إدوارد، المدير الرياضي للنادي، علشان يحلوا الأزمة مع أحمد حمدي، لاعب الفريق، وينهوا الخلافات اللي حصلت الفترة اللي فاتت.
وأوضح الغندور إن الجلسة جت بعد ما كان أحمد حمدي بيتدرب لوحده في النادي بسبب خلافه مع الجهاز الفني السابق، وكمان بسبب موضوع تجديد عقده، وده أثار مخاوف الإدارة من تأثير الوضع على استقرار الفريق في المباريات الجاية.
وأكد الإعلامي إن معتمد جمال طالب خلال الاجتماع بضرورة عودة اللاعب للتدريبات الجماعية، مشددًا على أهمية الاستفادة من كل العناصر المتاحة في الفريق، وفتح صفحة جديدة مع كل اللاعبين علشان يتحقق الانسجام والتوازن داخل غرفة خلع الملابس.
وأشار الغندور إلى إن الخطوة دي جايه ضمن حرص إدارة الزمالك على توفير بيئة مناسبة للاعبين، ودعم حالة الاستقرار النفسي والفني للفريق، خاصة مع بداية المرحلة الجاية من الموسم اللي بتتطلب تركيز كامل من كل اللاعبين بدون أي تأثير سلبي للخلافات الداخلية.
التعليقات