النهاردة، إبراهيم فايق كشف عن تفاصيل إعارة محمد مجدي أفشة نجم الأهلي للاتحاد السكندري، وأكد إن اللاعب في طريقه للإسكندرية بالفعل.
فايق نشر على فيسبوك بأسلوبه المعروف، وأكد إن الصفقة تمت وكتب: “شيله من ع الشاحن.. أفشه اتحادي على سبيل الإعارة لمدة ٦ شهور بنسبة ١٠٠٪”
وكمان قال إن أفشة دلوقتي على طريق الإسكندرية الصحراوي عشان يخلص الإجراءات الرسمية ويعمل جلسة تصوير للإعلان عن الصفقة.
«مش هقول مع السلامة».. أول تعليق من أفشة بعد رحيله عن الأهلي
أفشة ودّع جماهير الأهلي بعد انتقاله رسميًا للاتحاد السكندري على سبيل الإعارة.
في “ستوري” عبر إنستجرام، استعرض أفشة ذكرياته مع المارد الأحمر، وقال إن رحلته كانت مليانة لحظات تاريخية من “أفريقيا للدوري لبطولات العالم”.
وبجرأة، قارن أفشة بين نجاحاته وإخفاقاته، وقال: “كور كثيرة راحت وجات، واحدة غيرت تاريخ كبير، وواحدة قلشت طيرت فلوس كثير برضه”، وأكد إنه عاش “محبوبا ومتشال على الراس” من جمهور الأهلي
والمفاجأة كانت في إنه رفض يصف رحيله بالوداع النهائي، وأعرب عن أمله إن الفراق يكون “مؤقت لفترة قصيرة” ويرجع بعدها كما كان وأفضل.
اختتم أفشة رسالته بكلمات مؤثرة، وقال: “مش هقول مع السلامة.. هقول إلى لقاء قريب بإذن الله.. جمهور الأهلي من كل قلبي شكرا على اللي فات وعلى اللي جاي برضه”
أول رد من أفشة بعد خروج منتخب مصر من بطولة كأس العرب
أفشة قدم اعتذاره لجمهور الكرة المصرية بعد خروج منتخب مصر الثاني من كأس العرب، معبرًا عن استيائه من الأداء.
كتب أفشة في “ستوري”: «قبل أي كلام ينقال، لازم يكون أوله جملة واحدة بس، آسف جدًا جدًا، مهما حصل اسم مصر كبير وكان في أفضل من كده»
وكمل: «أنا حزين جدًا ومش بهرب من أي مسؤولية، الأداء كان لازم يكون أفضل، ومفيش تبرير غير كلمة آسف جدًا»
اختتم أفشة بقوله: «حقكم بصراحة، آسف مرة واحدة مش كفاية، آسف مليون مرة»
وعلى جانب آخر، قصي أبو عالية، نجم منتخب الأردن السابق، أبدى استياءه من مستوى منتخب مصر في البطولة، واصفًا الأداء بأنه بلا روح أو خطة واضحة.
التعليقات