في لحظة وداع مؤثرة، شكر ناصر ماهر جماهير الزمالك وإدارة النادي على دعمهم المستمر له منذ انضمامه، وذلك بعد انتقاله رسمياً إلى بيراميدز.
كتب ماهر على إنستجرام: “مش عارف أبدأ منين، لأن في حاجات مش سهلة تتقال، خصوصًا لجمهور عظيم زي جماهير الزمالك، اسمحولي أعبر عن حبي واحترامي ليكم، والله مش مجرد كلام”
وأضاف: “من أول يوم دخلت فيه النادي وأنا حاسس إن المكان ده فيه حاجة تتحب، يمكن عشان ده كيان كبير، أو عشان لاعبين كبار وشخصيات محترمة، أو عشان الجمهور المختلف بأجواءه ودعمه، بس في الآخر الكورة ممكن تخليك تسيب مكان انت بتحبه وده جزء من اللعبة، أنا بحبكم جدا والله”
وواصل: “النهارده آخر يوم لي في نادي الزمالك، النادي اللي تشرفت إني البس التيشيرت التاريخي بتاعه، ودافعت عنه بكل إخلاص وحب، إنتوا خلتوني نجم بجد، ودايمًا بقول إن ربنا أكرمني بجمهور الزمالك، يمكن الرحلة خلصت دلوقتي بسبب ظروف النادي الصعبة، وأتمنى أكون جزء ولو بسيط في حل الأزمة المالية، الزمالك كبير ويستحق إن الواحد يضحي عشانه، وبالنسبة لي الرحلة لسه فيها فصل تاني، إمتى؟ الله أعلم”
وأشار: “بشكر كل زملائي اللاعبين الرجالة بجد في كل المواقف، وبشكر إدارة النادي الزمالك برئاسة الكابتن حسين لبيب، وبشكر جميع المدربين اللي تدربت معاهم”
واختتم: “شكراً لك عبد الناصر محمد، شكراً لأحمد سليمان اللي خلاني أكون متواجد داخل نادي الزمالك، وكمان بشكر الأوفياء.. جمهور الزمالك العظيم، آخر حاجة هقولها: أنا دخلت النادي وقلت “أنا بحب الزمالك، ودلوقتي وأنا ماشي بقول: هفضل أحب الزمالك”
وفي نفس السياق، أعلن نادي بيراميدز عن التعاقد مع ناصر ماهر قادماً من الزمالك، لتعزيز خط الوسط خلال السنوات المقبلة، ضمن خطة النادي لدعم الفريق بأفضل اللاعبين في مختلف المراكز، خصوصًا في ظل الارتباطات العديدة محليًا وقاريًا.
ويعتبر ناصر ماهر واحد من أبرز اللاعبين في الكرة المصرية، وهو من مواليد 8 فبراير 1997.
بدأ ناصر ماهر مشواره في الناشئين بالنادي الأهلي، وبعدها تنقل بين أندية بتروجت وسموحة ومودرن سبورت والزمالك، قبل الانتقال إلى بيراميدز.
اللاعب انضم لبعثة نادي بيراميدز في المغرب، استعدادًا لمواجهة نهضة بركان في دوري الأبطال بعد قيده محليًا وقاريًا.
التعليقات