الإعلامي الرياضي محمد فارس حذر جمهور الأهلي من بعض النقاط المهمة في تقييم أداء اللاعبين، وأكد أن الانتقادات أمر طبيعي، لكن التفريط في بعض العناصر المحلية ممكن يكون كارثة كبيرة.
فارس قال في تغريدة عبر حسابه على منصة «إكس» إن الأهلي عنده أفضل خط هجومي من اللاعبين المحليين في مصر، وعلى رأسهم إمام عاشور، محمود حسن تريزيجيه، وأحمد سيد زيزو، وأوضح أن ده مش مجرد رأي، لكن حقائق مثبتة بالأرقام.
فارس أوضح أن اللاعب الأجنبي سهل تعويضه بسبب وجود خيارات كتير في السوق العالمي، لكن اللاعب المحلي المميز عملة نادرة، وده يخلي الثلاثي الحالي ميزة كبيرة للأهلي، مفيش نادي تاني يقدر ينافسه في النقطة دي.
بالنسبة لإمام عاشور، فارس أكد إنه كان سبب رئيسي في فوز الأهلي بالدوري الموسم الماضي، بعد ما ساهم بـ 20 هدف في 23 مباراة، وكمان 7 مساهمات في البطولات الإفريقية، وقال إنه مفيش لاعب في القارة بنفس مستوى إمام عاشور دلوقتي.
مفيش بديل ليهم.. محمد فارس يكشف أخطر خطأ ممكن يقع فيه الأهلي
وبالنسبة لزيزو، فارس أكد إنه قدم 10 مساهمات تهديفية في 15 مباراة هذا الموسم، وكان له دور كبير في استمرار المنافسة محليًا وكمان في الفوز بالسوبر المصري.
أما تريزيجيه، ففارس قال إنه سجل 10 أهداف في 18 مباراة، بينهم 5 أهداف في 3 مباريات بدور المجموعات الإفريقي، وكان له دور كبير في تصدر الأهلي لمجموعته، وهو حالياً متصدر قائمة هدافي البطولة.
محمد فارس: الأهلي كوش على أفضل لاعيبة محليين في مصر
فارس كشف إن القيمة السوقية للثلاثي حوالي 16 مليون دولار، ودي أعلى قيمة لأي لاعبين محليين أو أجانب في الدوري المصري، وأكد إن الأهلي «كوش» على أفضل اللاعبين المحليين، ومش هيقدر أي نادي تاني ينافسه في النقطة دي.
وفي ختام رسالته، فارس أكد إن النقد الفني مطلوب، لكن لازم يكون في إطار منطقي، وحذر من فقدان أي لاعب من الثلاثي ده على المدى البعيد، لأن السوق المحلي مش هيقدر يعوضهم.
التعليقات